sawad-e-shab ghanimat hai sitara jagmagata hai

savād-e-shab ġhanīmat hai sitārā jagmagātā hai

diloñ kī anjuman meñ isti.ārā jagmagātā hai

koī tūfān aa.e paar lagtī hai mirī kashtī

añdheroñ meñ bhī dariyā kā kinārā jagmagātā hai

basāyā hai kisī ne merī āñkhoñ meñ dhanak-manzar

koī bhī kaam ho us kā ishārā jagmagātā hai

zamāne ke diye ik hī diye se jalte haiñ lekin

bisāt-e-fard-e-vāhid kyā idāra jagmagātā hai

suhāne mausamoñ meñ kis kī rangat kā hai ye partav

dil-e-shādāb par kis kā ijārā jagmagātā hai

ḳhulūs-o-sādgī hai phūñs ke chhappar haiñ bastī meñ

ta.assub kī havā mat do sharārā jagmagātā hai

khaḌe haiñ log ahl-e-zar ke aage sar jhukā.e kyoñ

'azīm' apne ḳhudā kā hī sahārā jagmagātā hai

sawad-e-shab ghanimat hai sitara jagmagata hai

dilon ki anjuman mein istiara jagmagata hai

koi tufan aae par lagti hai meri kashti

andheron mein bhi dariya ka kinara jagmagata hai

basaya hai kisi ne meri aankhon mein dhanak-manzar

koi bhi kaam ho us ka ishaara jagmagata hai

zamane ke diye ek hi diye se jalte hain lekin

bisat-e-fard-e-wahid kya idara jagmagata hai

suhane mausamon mein kis ki rangat ka hai ye partaw

dil-e-shadab par kis ka ijara jagmagata hai

KHulus-o-sadgi hai phuns ke chhappar hain basti mein

tassub ki hawa mat do sharara jagmagata hai

khaDe hain log ahl-e-zar ke aage sar jhukae kyon

'azim' apne KHuda ka hi sahaara jagmagata hai