sawal-e-ishq par ta-hashr chup rahna paDa mujhko

savāl-e-ishq par tā-hashr chup rahnā paḌā mujh ko

har ik ilzām ko hañste hue sahnā paḌā mujh ko

kabhī maġhrūr tūfānoñ ko bhī Thukrā diyā maiñ ne

kabhī ik mauj-e-ġham ke saath hī bahnā paḌā mujh ko

sukūn-e-dil baḌī daulat sahī ai ham-nashīñ lekin

sukūñ pā kar bhī aksar muztarib rahnā paḌā mujh ko

zamāna kis qadar be-gāna-e-rasm-e-mohabbat thā

yahāñ to ḳhud se bhī nā-āshnā rahnā paḌā mujh ko

'ravish' is bazm-e-rañgīñ meñ sukūt-e-ġham kā afsāna

kahā jaatā na thā mujh se magar kahnā paḌā mujh ko

sawal-e-ishq par ta-hashr chup rahna paDa mujh ko

har ek ilzam ko hanste hue sahna paDa mujh ko

kabhi maghrur tufanon ko bhi Thukra diya main ne

kabhi ek mauj-e-gham ke sath hi bahna paDa mujh ko

sukun-e-dil baDi daulat sahi ai ham-nashin lekin

sukun pa kar bhi aksar muztarib rahna paDa mujh ko

zamana kis qadar be-gana-e-rasm-e-mohabbat tha

yahan to KHud se bhi na-ashna rahna paDa mujh ko

'rawish' is bazm-e-rangin mein sukut-e-gham ka afsana

kaha jata na tha mujh se magar kahna paDa mujh ko