sawal rind ke lab par jawab shishe mein

savāl rind ke lab par javāb shīshe meñ

zabān tishna-ba-lab aur sharāb shīshe meñ

kisī kī mad-bharī āñkhoñ meñ Dūbtā thā dil

Duboyā ham ne ye ḳhāna-ḳharāb shīshe meñ

tamanna jis kī hai jannat meñ shaiḳh sāhab ko

parī vo ham ne utārī janāb shīshe meñ

yuuñ apne 'ambarīñ hoñToñ se jaam ko chhū de

ki jaise 'aks-fagan ho gulāb shīshe meñ

tumhāre sāmne Thahrā hai aa.ina ho kar

vagarna pahle kahāñ thī ye aab shīshe meñ

dikhā na Dar hameñ roz-e-hisāb kā ai shaiḳh

Dubo.e ham ne hisāb-o-kitāb shīshe meñ

mirī ḳhudī hai haqīqat meñ be-ḳhudī merī

hai merī ziist kā lubb-e-lubāb shīshe meñ

isī pe hosh kā dā'vā hai ai 'amar' tum ko

sharāb siiḳh pe Daalī kabāb shīshe meñ

sawal rind ke lab par jawab shishe mein

zaban tishna-ba-lab aur sharab shishe mein

kisi ki mad-bhari aankhon mein Dubta tha dil

Duboya hum ne ye KHana-KHarab shishe mein

tamanna jis ki hai jannat mein shaiKH sahab ko

pari wo hum ne utari janab shishe mein

yun apne 'ambarin honTon se jam ko chhu de

ki jaise 'aks-fagan ho gulab shishe mein

tumhaare samne Thahra hai aaina ho kar

wagarna pahle kahan thi ye aab shishe mein

dikha na Dar hamein roz-e-hisab ka ai shaiKH

Duboe hum ne hisab-o-kitab shishe mein

meri KHudi hai haqiqat mein be-KHudi meri

hai meri zist ka lubb-e-lubab shishe mein

isi pe hosh ka da'wa hai ai 'amar' tum ko

sharab siKH pe Dali kabab shishe mein