sawal saKHt tha dariya ke par utar jaana

savāl saḳht thā dariyā ke paar utar jaanā

vo mauj mauj magar ḳhud mirā bikhar jaanā

ye kyā ḳhabar tumheñ kis ruup meñ huuñ zinda maiñ

mile na jism to saa.e ko qatl kar jaanā

paḌā huuñ yaḳh-zada sahrā-e-āgahī meñ hunūz

mire vajūd meñ thoḌī sī dhuup bhar jaanā

kabhī to saath ye āsīb-e-vaqt chhoḌegā

ḳhud apne saa.e ko bhī dekhnā to Dar jaanā

jo chāhte ho sahar ko na.ī zabān mile

to pichhlī shab ke charāġhoñ ko qatl kar jaanā

hamāre ahd kā har zehn to nahīñ jāmid

kisī darīcha-e-ehsās se guzar jaanā

'fazā' tujhī ko ye saffāki-e-hunar bhī milī

ik ek lafz ko yuuñ be-libās kar jaanā

sawal saKHt tha dariya ke par utar jaana

wo mauj mauj magar KHud mera bikhar jaana

ye kya KHabar tumhein kis rup mein hun zinda main

mile na jism to sae ko qatl kar jaana

paDa hun yaKH-zada sahra-e-agahi mein hunuz

mere wajud mein thoDi si dhup bhar jaana

kabhi to sath ye aasib-e-waqt chhoDega

KHud apne sae ko bhi dekhna to Dar jaana

jo chahte ho sahar ko nai zaban mile

to pichhli shab ke charaghon ko qatl kar jaana

hamare ahd ka har zehn to nahin jamid

kisi daricha-e-ehsas se guzar jaana

'faza' tujhi ko ye saffaki-e-hunar bhi mili

ek ek lafz ko yun be-libas kar jaana