sawal shukr-o-shikayat ka ab raha hi nahin

savāl shukr-o-shikāyat kā ab rahā hī nahīñ

vo kaj-shi.ār mirī samt dekhtā hī nahīñ

kisī meñ hausla-e-tark-e-mudda.ā hī nahīñ

ye vo mahāz hai jis par koī DaTā hī nahīñ

thamā jo ḳhair se tūfāñ to hai bhañvar aage

mire ḳhilāf samundar bhī hai havā hī nahīñ

vo jis kā ḳhauf gunāhoñ se rok detā hai

hamāre daur meñ aisī koī sazā hī nahīñ

jahāñ se pech-o-ḳham-e-rāh kā huā āġhāz

palaT ke ham ne jo dekhā to rahnumā hī nahīñ

jabīn-e-shauq batā ab kahāñ karūñ sajda

mujhe talāsh thī jis kī vo naqsh-e-pā hī nahīñ

fazā hai dañg samā.at ke us taġhayyur par

koī sadā-e-mohabbat se āshnā hī nahīñ

'nasīr' jā ke tirī anjuman se lauT aayā

gayā thā jis ke irāde se vo kahā hī nahīñ

sawal shukr-o-shikayat ka ab raha hi nahin

wo kaj-shiar meri samt dekhta hi nahin

kisi mein hausla-e-tark-e-muddaa hi nahin

ye wo mahaz hai jis par koi DaTa hi nahin

thama jo KHair se tufan to hai bhanwar aage

mere KHilaf samundar bhi hai hawa hi nahin

wo jis ka KHauf gunahon se rok deta hai

hamare daur mein aisi koi saza hi nahin

jahan se pech-o-KHam-e-rah ka hua aaghaz

palaT ke hum ne jo dekha to rahnuma hi nahin

jabin-e-shauq bata ab kahan karun sajda

mujhe talash thi jis ki wo naqsh-e-pa hi nahin

faza hai dang samaat ke us taghayyur par

koi sada-e-mohabbat se aashna hi nahin

'nasir' ja ke teri anjuman se lauT aaya

gaya tha jis ke irade se wo kaha hi nahin