sawalon mein KHud bhi hai Dubi udasi

savāloñ meñ ḳhud bhī hai Duubī udāsī

kahīñ le na Duube mujhe bhī udāsī

shab-o-roz chaltī hai pahlū se lag kar

gale paḌ ga.ī ek ziddī udāsī

fazāoñ kī rañgat nikharne lagī hai

huī shaam phir dil meñ lauTī udāsī

zarā chāñd kyā aayā merī taraf ko

sitāroñ ne jal-bhun ke oḌhī udāsī

shabistāñ meñ ġham kī na sham.eñ jalāo

kahīñ jaag jaa.e na soī udāsī

zarā der logoñ meñ khul kar hañsī phir

sar-e-bazm āñkhoñ se Tapkī udāsī

use yaad thī kal kī tārīḳh shāyad

sisaktī rahī le ke hichkī udāsī

jamī thī mire sard siine meñ kab se

tapish pā ke ashkoñ kī pighlī udāsī

katartī hai dil ke shajar kī ye ḳhushiyāñ

tirī yaad hai yā gilahrī udāsī

kabhī ham the jin kī duāoñ meñ shāmil

unhīñ tak na pahuñchī hamārī udāsī

tirī yaad ke ab nishāñ tak nahīñ ham

magar dil meñ rahtī hai ab bhī udāsī

nigāhoñ meñ hadd-e-nazar tak hai raqsāñ

udāsī udāsī udāsī udāsī

sawalon mein KHud bhi hai Dubi udasi

kahin le na Dube mujhe bhi udasi

shab-o-roz chalti hai pahlu se lag kar

gale paD gai ek ziddi udasi

fazaon ki rangat nikharne lagi hai

hui sham phir dil mein lauTi udasi

zara chand kya aaya meri taraf ko

sitaron ne jal-bhun ke oDhi udasi

shabistan mein gham ki na shamen jalao

kahin jag jae na soi udasi

zara der logon mein khul kar hansi phir

sar-e-bazm aankhon se Tapki udasi

use yaad thi kal ki tariKH shayad

sisakti rahi le ke hichki udasi

jami thi mere sard sine mein kab se

tapish pa ke ashkon ki pighli udasi

katarti hai dil ke shajar ki ye KHushiyan

teri yaad hai ya gilahri udasi

kabhi hum the jin ki duaon mein shamil

unhin tak na pahunchi hamari udasi

teri yaad ke ab nishan tak nahin hum

magar dil mein rahti hai ab bhi udasi

nigahon mein hadd-e-nazar tak hai raqsan

udasi udasi udasi udasi