saza hai kis ke liye aur jaza hai kis ke liye

sazā hai kis ke liye aur jazā hai kis ke liye

patā nahīñ dar-e-zindāñ khulā hai kis ke liye

surāhī-e-mai-e-nāb-o-safīna-hā-e-ġhazal

ye harf-e-husn-e-muqaddar likhā hai kis ke liye

faqat shunīd hai ab tak jo diid ho to batā.eñ

bahār-e-sabza-o-raqs-e-sabā hai kis ke liye

nahīñ jo apne liye bāvajūd zauq-e-nazar

sahīfa-e-ruḳh-o-rañg-e-hinā hai kis ke liye

miTā sake na agar tishna-kāmiyāñ merī

kaho ki ḳhūbī-e-āb-o-havā hai kis ke liye

tumheñ nahīñ ho agar aaj gosh-bar-āvāz

ye merī fikr ye merī navā hai kis ke liye

ye ik savāl hai shikva nahīñ gila bhī nahīñ

mire ḳhudā tirā lutf-o-atā hai kis ke liye

saza hai kis ke liye aur jaza hai kis ke liye

pata nahin dar-e-zindan khula hai kis ke liye

surahi-e-mai-e-nab-o-safina-ha-e-ghazal

ye harf-e-husn-e-muqaddar likha hai kis ke liye

faqat shunid hai ab tak jo did ho to bataen

bahaar-e-sabza-o-raqs-e-saba hai kis ke liye

nahin jo apne liye bawajud zauq-e-nazar

sahifa-e-ruKH-o-rang-e-hina hai kis ke liye

miTa sake na agar tishna-kaamiyan meri

kaho ki KHubi-e-ab-o-hawa hai kis ke liye

tumhein nahin ho agar aaj gosh-bar-awaz

ye meri fikr ye meri nawa hai kis ke liye

ye ek sawal hai shikwa nahin gila bhi nahin

mere KHuda tera lutf-o-ata hai kis ke liye