sehn-e-dil ke sabhi phulon ko jawan rahne do

sehn-e-dil ke sabhī phūloñ ko javāñ rahne do

pur-shabāb apne chaman kā ye samāñ rahne do

phir kabhī sar na uThā paa.eñ jahāñ ke zālim

sīna-e-zulm pe sīdhā sā nishāñ rahne do

ho na jaa.e kabhī ehsās kā bulbul ġhamgīñ

is ko rakkho na nihāñ balki ayaañ rahne do

tum ko rakhnā hai taqaddus kī fazā gar qaa.em

dil kī masjid meñ mohabbat kī azaañ rahne do

āb-e-irfāñ se raheñ haq ke musāfir sairāb

apne atrāf hidāyat kā kuaañ rahne do

dil karo fat.h tum iḳhlās kī talvāroñ se

nafrat-o-buġhz ke tum teġh-o-sināñ rahne do

dard darvāza-e-dil par na de dastak 'ainī'

mad.h-e-mahbūb sadā vird-e-zabāñ rahne do

sehn-e-dil ke sabhi phulon ko jawan rahne do

pur-shabab apne chaman ka ye saman rahne do

phir kabhi sar na uTha paen jahan ke zalim

sina-e-zulm pe sidha sa nishan rahne do

ho na jae kabhi ehsas ka bulbul ghamgin

is ko rakkho na nihan balki ayan rahne do

tum ko rakhna hai taqaddus ki faza gar qaem

dil ki masjid mein mohabbat ki azan rahne do

aab-e-irfan se rahen haq ke musafir sairab

apne atraf hidayat ka kuan rahne do

dil karo fath tum iKHlas ki talwaron se

nafrat-o-bughz ke tum tegh-o-sinan rahne do

dard darwaza-e-dil par na de dastak 'aini'

madh-e-mahbub sada wird-e-zaban rahne do