شاعر ہوں محبت کا مجھے کیا کوئی غم ہے

شاعر ہوں محبت کا مجھے کیا کوئی غم ہے

طوفاں ہے اگر دل میں تو ہاتھوں میں قلم ہے

پلٹے جو کبھی ماضی کے اوراق تو دیکھا

اک زود فراموش کھڑا مثل صنم ہے

بکھرے ہوئے ابرو ہیں تو دامن میں ہیں پیوند

سر کج کی روش پہ ہے تو سینے میں بھی خم ہے

قاصد کی بنائی ہوئی باتوں پہ نہ جانا

پڑھنا تو مرے دل کی تجھے میری قسم ہے

تصویر ابھرتے ہی نظر آتا ہے اک رنگ

رنگ ایسا کہ لگتا ہے کوئی گرد الم ہے

صد شکر کہ بخشی ہے مجھے لکھنے کی طاقت

مالک یہ مری مرضی کہاں تیرا کرم ہے

غزلیں کہوں یا دل کا تڑپنا کہوں کاوشؔ

زر خانہ یہی میرا یہی جاہ و حشم ہے