shair hun mohabbat ka mujhe kya koi gham hai

shā'ir huuñ mohabbat kā mujhe kyā koī ġham hai

tūfāñ hai agar dil meñ to hāthoñ meñ qalam hai

palTe jo kabhī maazī ke aurāq to dekhā

ik zūd-farāmosh khaḌā misl-e-sanam hai

bikhre hue abrū haiñ to dāman meñ haiñ paivand

sar kaj kī ravish pe hai to siine meñ bhī ḳham hai

qāsid kī banā.ī huī bātoñ pe na jaanā

paḌhnā tū mire dil kī tujhe merī qasam hai

tasvīr ubharte hī nazar aatā hai ik rang

rang aisā ki lagtā hai koī gard-e-alam hai

sad-shukr ki baḳhshī hai mujhe likhne kī tāqat

mālik ye mirī marzī kahāñ terā karam hai

ġhazleñ kahūñ yā dil kā taḌapnā kahūñ 'kāvish'

zar-ḳhāna yahī merā yahī jāh-o-hasham hai

sha'ir hun mohabbat ka mujhe kya koi gham hai

tufan hai agar dil mein to hathon mein qalam hai

palTe jo kabhi mazi ke auraq to dekha

ek zud-faramosh khaDa misl-e-sanam hai

bikhre hue abru hain to daman mein hain paiwand

sar kaj ki rawish pe hai to sine mein bhi KHam hai

qasid ki banai hui baaton pe na jaana

paDhna tu mere dil ki tujhe meri qasam hai

taswir ubharte hi nazar aata hai ek rang

rang aisa ki lagta hai koi gard-e-alam hai

sad-shukr ki baKHshi hai mujhe likhne ki taqat

malik ye meri marzi kahan tera karam hai

ghazlen kahun ya dil ka taDapna kahun 'kawish'

zar-KHana yahi mera yahi jah-o-hasham hai