شاعری شاعروں کی زینت ہے

شاعری شاعروں کی زینت ہے

اس لیے آپ سے محبت ہے

یعنی رمضان کا مہینہ بھی

مومنوں کے لیے فضیلت ہے

کچھ نہیں ماورائے حیرت چشم

چشم بینا کی بس سہولت ہے

زندگی داستان عشق ہے اور

عشق سے زندگی کو راحت ہے

آپ کو دیکھ کر تسلی ہوئی

آپ کا دیکھنا قیامت ہے

پھول دیوار پر نظر آئے

یہ بھی تو آپ کی کرامت ہے

میں نے دیکھا جہان فانی میں

جیسی حسرت تھی ویسی حسرت ہے

رنج و غم دکھ ملال اور خوشی

جو بھی ہے آپ کی بدولت ہے

اور کوئی نہیں ہے بات عمودؔ

بس انہیں دیکھنے کی عادت ہے