shabash ashk-e-gham koi charcha kiye baghair

shābāsh ashk-e-ġham koī charchā kiye baġhair

kah dī jo baat kahnī thī shikva kiye baġhair

bantī nahīñ hai baat taqāzā kiye baġhair

yā'nī unhīñ se un kī tamanna kiye baġhair

vallāh aur jalvoñ kī baḌh jaa.e ahmiyat

koī rahe jo sāmne pardā kiye baġhair

jaatā huuñ rāh-e-'ishq meñ mardāna-vār maiñ

barbādiyoñ kī koī bhī parvā kiye baġhair

tum ko bhī daad denī paḌe jazb-e-‘ishq kī

mil jaao tum jo mujh ko tamanna kiye baġhair

banda-navāz itnā hai tum se mujhe lagāv

dil māntā nahīñ tumheñ sajda kiye baġhair

'rāfat' kabhī na hogā mukammal junūn-e-‘ishq

tār-e-nafas se har nafas uljhā kiye baġhair

shabash ashk-e-gham koi charcha kiye baghair

kah di jo baat kahni thi shikwa kiye baghair

banti nahin hai baat taqaza kiye baghair

ya'ni unhin se un ki tamanna kiye baghair

wallah aur jalwon ki baDh jae ahmiyat

koi rahe jo samne parda kiye baghair

jata hun rah-e-'ishq mein mardana-war main

barbaadiyon ki koi bhi parwa kiye baghair

tum ko bhi dad deni paDe jazb-e-‘ishq ki

mil jao tum jo mujh ko tamanna kiye baghair

banda-nawaz itna hai tum se mujhe lagaw

dil manta nahin tumhein sajda kiye baghair

'rafat' kabhi na hoga mukammal junun-e-‘ishq

tar-e-nafas se har nafas uljha kiye baghair