shadi na karo jhagDon ka saman na rahega

shādī na karo jhagḌoñ kā sāmāñ na rahegā

sāhil pe kabhī ḳhatra-e-tūfāñ na rahegā

duniyā ko fanā hai koī insāñ na rahegā

lekin nahīñ sunte haiñ ki shaitāñ na rahegā

faaqe hoñ to ulfat kā bhī unvāñ na rahegā

jab ho ġham-e-jānāñ ġham-e-daurāñ na rahegā

rāshan kī qasam gar yahī hālat rahī kuchh din

koī bhī kisī ke yahāñ mehmāñ na rahegā

bad-ma.āsh ye kahte the jo āzād huā hind

hogī na sazā ek bhī zindāñ na rahegā

bantī yūñhī tāroñ se jo chuntā rahā kāñTe

sahrā meñ koī ḳhār-e-muġhīlāñ na rahegā

bulvāyā rafū-gar ko abhī chaak kī hai fikr

tab aa.egā jab paas garebāñ na rahegā

sin Dhalte hī sab baaz ke pinjroñ se uḌeñge

lamchhar na rahegā koī Tuyyāñ na rahegā

mardoñ ke the marghaT jahāñ haiñ zindoñ ke bangle

sunte haiñ koī gor-e-ġharībāñ na rahegā

haañ poplā muñh āshiq-e-nāshād ko dekho

phir zehn meñ bhī chit koī Tuyyāñ na rahegā

shadi na karo jhagDon ka saman na rahega

sahil pe kabhi KHatra-e-tufan na rahega

duniya ko fana hai koi insan na rahega

lekin nahin sunte hain ki shaitan na rahega

faqe hon to ulfat ka bhi unwan na rahega

jab ho gham-e-jaanan gham-e-dauran na rahega

rashan ki qasam gar yahi haalat rahi kuchh din

koi bhi kisi ke yahan mehman na rahega

bad-maash ye kahte the jo aazad hua hind

hogi na saza ek bhi zindan na rahega

banti yunhi taron se jo chunta raha kanTe

sahra mein koi KHar-e-mughilan na rahega

bulwaya rafu-gar ko abhi chaak ki hai fikr

tab aaega jab pas gareban na rahega

sin Dhalte hi sab baz ke pinjron se uDenge

lamchhar na rahega koi Tuyyan na rahega

mardon ke the marghaT jahan hain zindon ke bangle

sunte hain koi gor-e-ghariban na rahega

han popla munh aashiq-e-nashad ko dekho

phir zehn mein bhi chit koi Tuyyan na rahega