shaeri mazhar-e-ahwal-e-darun hai yun hai

shā.erī maz.har-e-ahvāl-e-darūñ hai yuuñ hai

ek ik sher batā detā hai yuuñ hai yuuñ hai

ik tirī yaad hī detī hai mire dil ko qarār

ik tirā naam hī ab vaj.h-e-sukūñ hai yuuñ hai

ḳhushk sahrā bhī nazar aatā hai gulzār-e-iram

hamrahī kā ye tirī saarā fusūñ hai yuuñ hai

ishq har ik se ġhulāmī kī adā māñgtā hai

us ke darbār meñ jo sar hai nigūñ hai yuuñ hai

ḳhaak chhāneñge chalo ham bhī bayābānoñ kī

jab yahī sheva-e-arbāb-e-junūñ hai yuuñ hai

hāl-e-dil sun ke mirā chup na raho kuchh to kaho

ḳhāmushī ne.amat-e-goyā.ī kā ḳhuuñ hai yuuñ hai

jab bhī mahfil meñ ġhazal apnī sunātā hai 'ḳhumār'

tabsire hote haiñ har sher pe yuuñ hai yuuñ hai

shaeri mazhar-e-ahwal-e-darun hai yun hai

ek ek sher bata deta hai yun hai yun hai

ek teri yaad hi deti hai mere dil ko qarar

ek tera nam hi ab wajh-e-sukun hai yun hai

KHushk sahra bhi nazar aata hai gulzar-e-iram

hamrahi ka ye teri sara fusun hai yun hai

ishq har ek se ghulami ki ada mangta hai

us ke darbar mein jo sar hai nigun hai yun hai

KHak chhanenge chalo hum bhi bayabanon ki

jab yahi shewa-e-arbab-e-junun hai yun hai

haal-e-dil sun ke mera chup na raho kuchh to kaho

KHamushi neamat-e-goyai ka KHun hai yun hai

jab bhi mahfil mein ghazal apni sunata hai 'KHumar'

tabsire hote hain har sher pe yun hai yun hai