shaiba hijrat ka ab mere irade mein nahin

shā.iba hijrat kā ab mere irāde meñ nahīñ

dūsrī ansār kī bastī bhī naqshe meñ nahīñ

ishq ko denā paḌā hai apnī sāñsoñ kā ḳhirāj

ye bhī tai hai is binā par maiñ ḳhasāre meñ nahīñ

ḳhush-gumāñ haiñ TuuTe phūTe log bhī is shahr meñ

kaun hai vo jo dabā ḳhud apne malbe meñ nahīñ

ye alamiya hai chamakte jagmagāte daur kā

raushnī hote hue bhī ham ujāle meñ nahīñ

ho nahīñ saktī anā ik ḳhāksārī se buland

boriye meñ jo masarrat hai vo sofe meñ nahīñ

chand lamhoñ meñ huā kartā hai tai lambā safar

kyā hai vo raftār jo sikkoñ ke pahiye meñ nahīñ

tū ne kyā ne.amat atā kī hai dil-e-'maqsūd' ko

mujh meñ hai jo dard vo koī farishte meñ nahīñ

shaiba hijrat ka ab mere irade mein nahin

dusri ansar ki basti bhi naqshe mein nahin

ishq ko dena paDa hai apni sanson ka KHiraj

ye bhi tai hai is bina par main KHasare mein nahin

KHush-guman hain TuTe phuTe log bhi is shahr mein

kaun hai wo jo daba KHud apne malbe mein nahin

ye alamiya hai chamakte jagmagate daur ka

raushni hote hue bhi hum ujale mein nahin

ho nahin sakti ana ek KHaksari se buland

boriye mein jo masarrat hai wo sofe mein nahin

chand lamhon mein hua karta hai tai lamba safar

kya hai wo raftar jo sikkon ke pahiye mein nahin

tu ne kya neamat ata ki hai dil-e-'maqsud' ko

mujh mein hai jo dard wo koi farishte mein nahin