shair hue to kya hue ehsan hi rahe

shā.ir hue to kyā hue 'ehsān' hī rahe

'mirzā'-o-'mīr' ban na sake ḳhaan hī rahe

imkāñ ke dā.ere ko jo vus.at na de sake

apne hudūd-e-zāt kā irfān hī rahe

jab dil ho muztarib to kahāñ tak ḳhudī kī laaj

ai nāz-e-husn aaj tirī aan hī rahe

aahaT kisī ke paañv kī aa.ī na sub.h tak

ham dil kī dhaḌkanoñ ke nigahbān hī rahe

pahuñchā na dast-e-shauq jo dāmān-e-yār tak

be-shaġhl kyoñ ho apnā garebān hī rahe

hai iltijā-e-shauq meñ bhī tantana vahī

'ehsān' ishq karke bhī 'ehsān' hī rahe

shair hue to kya hue 'ehsan' hi rahe

'mirza'-o-'mir' ban na sake KHan hi rahe

imkan ke daere ko jo wusat na de sake

apne hudud-e-zat ka irfan hi rahe

jab dil ho muztarib to kahan tak KHudi ki laj

ai naz-e-husn aaj teri aan hi rahe

aahaT kisi ke panw ki aai na subh tak

hum dil ki dhaDkanon ke nigahban hi rahe

pahuncha na dast-e-shauq jo daman-e-yar tak

be-shaghl kyon ho apna gareban hi rahe

hai iltija-e-shauq mein bhi tantana wahi

'ehsan' ishq karke bhi 'ehsan' hi rahe