shairon ko ab qasidon ka sila deta hai kaun

shā.iroñ ko ab qasīdoñ kā sila detā hai kaun

bas duā.eñ dete haiñ sab rupya detā hai kaun

ye chhalāvā hai koī yā bhuut terī yaad kā

raat ke pichhle pahar mujh ko sadā detā hai kaun

maan lī hai maiñ ne mannat ik valī ik piir se

dekhnā hai mujh ko beTā chāñd sā detā hai kaun

chāplūsī phaTke-bāzī se milī manzil mujhe

itnī āsānī se varna rāsta detā hai kaun

maiñ to piitā hī nahīñ huuñ hosh meñ rah kar sharāb

maiñ huuñ hairāñ ḳhvāb-e-ġhaflat meñ pilā detā hai kaun

bechte haiñ shaiḳh sāhib āyateñ qur.ān kī

qabr par ujrat baġhair ab fātiha detā hai kaun

arz kī hai ḳhvāhish-e-ahbāb par maiñ ne ġhazal

dekhiye 'vāhid' mujhe ab nāshta detā hai kaun

shairon ko ab qasidon ka sila deta hai kaun

bas duaen dete hain sab rupya deta hai kaun

ye chhalawa hai koi ya bhut teri yaad ka

raat ke pichhle pahar mujh ko sada deta hai kaun

man li hai main ne mannat ek wali ek pir se

dekhna hai mujh ko beTa chand sa deta hai kaun

chaplusi phaTke-bazi se mili manzil mujhe

itni aasani se warna rasta deta hai kaun

main to pita hi nahin hun hosh mein rah kar sharab

main hun hairan KHwab-e-ghaflat mein pila deta hai kaun

bechte hain shaiKH sahib aayaten quran ki

qabr par ujrat baghair ab fatiha deta hai kaun

arz ki hai KHwahish-e-ahbab par main ne ghazal

dekhiye 'wahid' mujhe ab nashta deta hai kaun