shaKH-e-lab par gul-e-dua rakhna

shāḳh-e-lab par gul-e-duā rakhnā

aur ḳhushbū se rābta rakhnā

ye ruteñ kab Thaharne vaalī haiñ

in se ummīd koī kyā rakhnā

aane vaalā hai vo sitāra-badan

dar-e-ehsās ko khulā rakhnā

vaqt kuchh kuchh muvāfaqat meñ hai

kaam kal par na tum uThā rakhnā

rāstoñ meñ bahut añdherā hai

saath ehsās kā diyā rakhnā

ḳhud samajh jāoge ki tum kyā ho

sāmne apne aa.ina rakhnā

is se ummīd-e-sā.ebānī hai

is shajar ko harā-bharā rakhnā

rahnumā.ī ke vāste hamrāh

merī zanjīr naqsh-e-pā rakhnā

chand hī gaam hai jahān-e-falak

'nūr' bas thoḌā hausla rakhnā

shaKH-e-lab par gul-e-dua rakhna

aur KHushbu se rabta rakhna

ye ruten kab Thaharne wali hain

in se ummid koi kya rakhna

aane wala hai wo sitara-badan

dar-e-ehsas ko khula rakhna

waqt kuchh kuchh muwafaqat mein hai

kaam kal par na tum uTha rakhna

raston mein bahut andhera hai

sath ehsas ka diya rakhna

KHud samajh jaoge ki tum kya ho

samne apne aaina rakhna

is se ummid-e-saebani hai

is shajar ko hara-bhara rakhna

rahnumai ke waste hamrah

meri zanjir naqsh-e-pa rakhna

chand hi gam hai jahan-e-falak

'nur' bas thoDa hausla rakhna