shaKH par tair nahin mahw-e-fughan baiTha hua

shāḳh par taa.ir nahīñ mahv-e-fuġhāñ baiThā huā

hai koī āshiq sar-e-fasl-e-ḳhizāñ baiThā huā

mai-kade meñ nisf shab tishna-dahāñ baiThā huā

muztarib masrūf-e-yād-e-raftagāñ baiThā huā

ilm rakhtā huuñ vahāñ kā maiñ yahāñ baiThā huā

kaun hai aql-o-ḳhirad ke darmiyāñ baiThā huā

be-sukūñ afsurda-dil be-āstāñ baiThā huā

kar rahā hai vaqt apnā rā.egāñ baiThā huā

sabr kī talqīn paḌhtā hai ḳhud apnī laash par

dil ke qabristān meñ ik naujavāñ baiThā huā

apnā lahja apnī bāteñ apnā andāz-e-suḳhan

kar rahā hai dāstān-e-ġham bayāñ baiThā huā

naqsh hai paanī pe aks-e-paikar-e-shams-o-qamar

ham ne dekhā hai zamīñ pe āsmāñ baiThā huā

maslahat kī teġh se apnī zabāneñ kaaT kar

har bashar apnī jagah hai be-zabāñ baiThā huā

haif hai ḳhasta-dilī pe 'mahvar'-e-ranj-o-alam

vaa.e ho hañstā rahā pīr-e-muġhāñ baiThā thā

shaKH par tair nahin mahw-e-fughan baiTha hua

hai koi aashiq sar-e-fasl-e-KHizan baiTha hua

mai-kade mein nisf shab tishna-dahan baiTha hua

muztarib masruf-e-yaad-e-raftagan baiTha hua

ilm rakhta hun wahan ka main yahan baiTha hua

kaun hai aql-o-KHirad ke darmiyan baiTha hua

be-sukun afsurda-dil be-astan baiTha hua

kar raha hai waqt apna raegan baiTha hua

sabr ki talqin paDhta hai KHud apni lash par

dil ke qabristan mein ek naujawan baiTha hua

apna lahja apni baaten apna andaz-e-suKHan

kar raha hai dastan-e-gham bayan baiTha hua

naqsh hai pani pe aks-e-paikar-e-shams-o-qamar

hum ne dekha hai zamin pe aasman baiTha hua

maslahat ki tegh se apni zabanen kaT kar

har bashar apni jagah hai be-zaban baiTha hua

haif hai KHasta-dili pe 'mahwar'-e-ranj-o-alam

wae ho hansta raha pir-e-mughan baiTha tha