shaKH se phul ko phir juda kar diya

shāḳh se phuul ko phir judā kar diyā

zaḳhm peḌoñ kā kis ne harā kar diyā

ek TukḌā ḳhushī kā thā rakkhā huā

jaane kis shaḳhs ne lāpata kar diyā

kyuuñ ta.alluq kī buniyād Dahne lagī

be-yaqīnī ko kis ne khaḌā kar diyā

pahle manzil dikhā.ī mujhe aur phir

band chāroñ taraf rāsta kar diyā

vaqt ḳhud apne chehre se Dar jā.egā

maiñ ne ehsās ko aa.ina kar diyā

kaun ḳhush-fahmiyāñ pāltā roz-o-shab

shukr hai zindagī ne rihā kar diyā

vaqt ne chaal kaisī chalī ai 'hasan'

dost jaise ko dushman-numā kar diyā

shaKH se phul ko phir juda kar diya

zaKHm peDon ka kis ne hara kar diya

ek TukDa KHushi ka tha rakkha hua

jaane kis shaKHs ne lapata kar diya

kyun talluq ki buniyaad Dahne lagi

be-yaqini ko kis ne khaDa kar diya

pahle manzil dikhai mujhe aur phir

band chaaron taraf rasta kar diya

waqt KHud apne chehre se Dar jaega

main ne ehsas ko aaina kar diya

kaun KHush-fahmiyan palta roz-o-shab

shukr hai zindagi ne riha kar diya

waqt ne chaal kaisi chali ai 'hasan'

dost jaise ko dushman-numa kar diya