shaKHcha KHak-e-gulistan mein paDa hai yaro

shāḳhcha ḳhāk-e-gulistāñ meñ paḌā hai yaaro

us se ehsān-e-bahārāñ na uThā hai yaaro

tum ne pūchhā hai na kuchh ham ne kahā hai yaaro

hādisa ham pe jo guzrā hai to kyā hai yaaro

kar gayā ḳhaak hameñ ruḳhsat-e-gul kā manzar

zaḳhm-e-nazzāra magar ab bhī harā hai yaaro

maryam-e-shām khule baal phir aatī dekho

phir masīhā koī suulī pe chaḌhā hai yaaro

raat añdherī sahī māyūs nahīñ nuur se ham

ashk palkoñ pe abhī kaañp rahā hai yaaro

ab mirī shab mire ashkoñ se rahegī raushan

shaam ke vaqt diyā merā bujhā hai yaaro

sāmne aate ho ab ajnabiyoñ kī sūrat

ye bhī shāyad koī yaarī kī adā hai yaaro

paañv haiñ ḳhaak pe ḳhurshīd pe saaya us kā

'hashamī' khoj meñ ye kis kī chalā hai yaaro

shaKHcha KHak-e-gulistan mein paDa hai yaro

us se ehsan-e-bahaaran na uTha hai yaro

tum ne puchha hai na kuchh hum ne kaha hai yaro

hadisa hum pe jo guzra hai to kya hai yaro

kar gaya KHak hamein ruKHsat-e-gul ka manzar

zaKHm-e-nazzara magar ab bhi hara hai yaro

maryam-e-sham khule baal phir aati dekho

phir masiha koi suli pe chaDha hai yaro

raat andheri sahi mayus nahin nur se hum

ashk palkon pe abhi kanp raha hai yaro

ab meri shab mere ashkon se rahegi raushan

sham ke waqt diya mera bujha hai yaro

samne aate ho ab ajnabiyon ki surat

ye bhi shayad koi yari ki ada hai yaro

panw hain KHak pe KHurshid pe saya us ka

'hashami' khoj mein ye kis ki chala hai yaro