sham Dhalte der tak chhat par khaDi rahti hun main

shaam Dhalte der tak chhat par khaḌī rahtī huuñ maiñ

Dūbte sūraj ko jānāñ dekhtī rahtī huuñ maiñ

kaisī kaisī uljhanoñ meñ ab paḌī rahtī huuñ maiñ

jaane kyā kyā dekhtī aur sochtī rahtī huuñ maiñ

koī zer-e-lab hamesha gungunātā hai mujhe

maiñ kisī ke dil kī huuñ aur an-kahī rahtī huuñ maiñ

ek duniyā kā safar hai us ke mere darmiyāñ

fāsle hī fāsle haiñ nāptī rahtī huuñ maiñ

kaisā bādal hai lipaT jaatā hai mujh se ḳhvāb meñ

kaisī bārish hai ki shab bhar bhīgtī rahtī huuñ maiñ

sāneha kyā thā tamīz-e-farhat-o-ġham miT ga.ī

ab koī rut ho hamesha ek sī rahtī huuñ maiñ

ik sitāra der tak kartā hai mujh se guftugū

vo nahīñ sotā so jānāñ jāgtī rahtī huuñ maiñ

sham Dhalte der tak chhat par khaDi rahti hun main

Dubte suraj ko jaanan dekhti rahti hun main

kaisi kaisi uljhanon mein ab paDi rahti hun main

jaane kya kya dekhti aur sochti rahti hun main

koi zer-e-lab hamesha gungunata hai mujhe

main kisi ke dil ki hun aur an-kahi rahti hun main

ek duniya ka safar hai us ke mere darmiyan

fasle hi fasle hain napti rahti hun main

kaisa baadal hai lipaT jata hai mujh se KHwab mein

kaisi barish hai ki shab bhar bhigti rahti hun main

saneha kya tha tamiz-e-farhat-o-gham miT gai

ab koi rut ho hamesha ek si rahti hun main

ek sitara der tak karta hai mujh se guftugu

wo nahin sota so jaanan jagti rahti hun main