شام ڈھلتے ہی اجالوں کو اگاتے ہیں چراغ

شام ڈھلتے ہی اجالوں کو اگاتے ہیں چراغ

دشمنی یوں بھی اندھیروں سے نبھاتے ہیں چراغ

جشن ہی جشن کا ماحول بنا رکھا ہے

جھومتی لو سے زمانے کو لبھاتے ہیں چراغ

ابتدا یہ ہے کہ قاتل کی پذیرائی ہے

انتہا یہ ہے کہ تہذیب کو ڈھاتے ہیں چراغ

دل منور ہو تو ظلمت بھی سکوں دیتی ہے

ورنہ آنکھوں کی ہی ویرانی بڑھاتے ہیں چراغ

ان کو آندھی سے بھی لڑنے کا ہنر آتا ہے

بے زباں ہو کے بھی کیا کیا نہ سکھاتے ہیں چراغ

آ مری جان مری روح کو روشن کر دے

آ سر عام محبت کے سجاتے ہیں چراغ

لمحہ لمحہ مری خلوت میں سمٹ کر شاہدؔ

داستاں موج میں مقتل کی سناتے ہیں چراغ