sham Dhalte hi ujalon ko ugate hain charagh

shaam Dhalte hī ujāloñ ko ugāte haiñ charāġh

dushmanī yuuñ bhī añdheroñ se nibhāte haiñ charāġh

jashn hī jashn kā māhaul banā rakkhā hai

jhūmtī lau se zamāne ko lubhāte haiñ charāġh

ibtidā ye hai ki qātil kī pazīrā.ī hai

intihā ye hai ki tahzīb ko Dhāte haiñ charāġh

dil munavvar ho to zulmat bhī sukūñ detī hai

varna āñkhoñ kī hī vīrānī baḌhāte haiñ charāġh

in ko āñdhī se bhī laḌne kā hunar aatā hai

be-zabāñ ho ke bhī kyā kyā na sikhāte haiñ charāġh

aa mirī jaan mirī ruuh ko raushan kar de

aa sar-e-ām mohabbat ke sajāte haiñ charāġh

lamha lamha mirī ḳhalvat meñ simaT kar 'shāhid'

dāstāñ mauj meñ maqtal kī sunāte haiñ charāġh

sham Dhalte hi ujalon ko ugate hain charagh

dushmani yun bhi andheron se nibhate hain charagh

jashn hi jashn ka mahaul bana rakkha hai

jhumti lau se zamane ko lubhate hain charagh

ibtida ye hai ki qatil ki pazirai hai

intiha ye hai ki tahzib ko Dhate hain charagh

dil munawwar ho to zulmat bhi sukun deti hai

warna aankhon ki hi virani baDhate hain charagh

in ko aandhi se bhi laDne ka hunar aata hai

be-zaban ho ke bhi kya kya na sikhate hain charagh

aa meri jaan meri ruh ko raushan kar de

aa sar-e-am mohabbat ke sajate hain charagh

lamha lamha meri KHalwat mein simaT kar 'shahid'

dastan mauj mein maqtal ki sunate hain charagh