sham-e-be-mehar mein ek yaad ka jugnu chamka

shām-e-be-mehar meñ ik yaad kā jugnū chamkā

aur phir ek hī chehra thā ki har-sū chamkā

ai charāġh-e-nigah-e-yār maiñ jaañ se guzrā

ab mujhe kyā jo pa.e dil-zadagāñ to chamkā

roz milte the to be-rang thā terā milnā

duur rahne se tire qurb kā jaadū chamkā

dil meñ phir bujhne lagā zabt kā taarā koī

phir mirī nok-e-mizha par koī aañsū chamkā

tāj-e-ḳhusrav kī chamak maañd paḌī jaatī hai

shahr ke kūcha-o-bāzār meñ lohū chamkā

kho gayā hai unhī tārīk ḳhalāoñ meñ kahīñ

vo bhī kyā chāñd thā jis se mirā pahlū chamkā

maiñ ne jaanā ki 'farāsat' koī ġham-ḳhvār aayā

aks-e-mahtāb kuchh is tarah lab-e-jū chamkā

sham-e-be-mehar mein ek yaad ka jugnu chamka

aur phir ek hi chehra tha ki har-su chamka

ai charagh-e-nigah-e-yar main jaan se guzra

ab mujhe kya jo pae dil-zadagan to chamka

roz milte the to be-rang tha tera milna

dur rahne se tere qurb ka jadu chamka

dil mein phir bujhne laga zabt ka tara koi

phir meri nok-e-mizha par koi aansu chamka

taj-e-KHusraw ki chamak mand paDi jati hai

shahr ke kucha-o-bazar mein lohu chamka

kho gaya hai unhi tarik KHalaon mein kahin

wo bhi kya chand tha jis se mera pahlu chamka

main ne jaana ki 'farasat' koi gham-KHwar aaya

aks-e-mahtab kuchh is tarah lab-e-ju chamka