sham-e-gham aur sitaron ke siwa

shām-e-ġham aur sitāroñ ke sivā

jī sake ham na sahāroñ ke sivā

talḳhī-e-āḳhir-e-shab kaun sahe

hijr meñ dard ke māroñ ke sivā

be-ruḳhī bhī to bajā hai lekin

phuul kyā chiiz haiñ ḳhāroñ ke sivā

kis ko fursat hai ki ho sair-e-chaman

māh-rū shola-e.azāroñ ke sivā

rañg duniyā meñ ka.ī aur bhī haiñ

bahkī bahkī sī bahāroñ ke sivā

jaane jannat meñ bhī kyā rakkhā hai

aise hī shoḳh nazāroñ ke sivā

zindagī sab ko sadā detī hai

haañ magar arz-guzāroñ ke sivā

sham-e-gham aur sitaron ke siwa

ji sake hum na sahaaron ke siwa

talKHi-e-aKHir-e-shab kaun sahe

hijr mein dard ke maron ke siwa

be-ruKHi bhi to baja hai lekin

phul kya chiz hain KHaron ke siwa

kis ko fursat hai ki ho sair-e-chaman

mah-ru shola-eazaron ke siwa

rang duniya mein kai aur bhi hain

bahki bahki si bahaaron ke siwa

jaane jannat mein bhi kya rakkha hai

aise hi shoKH nazaron ke siwa

zindagi sab ko sada deti hai

han magar arz-guzaron ke siwa