sham-e-gham bimar ke dil par wo ban aai ki bas

shām-e-ġham bīmār ke dil par vo ban aa.ī ki bas

har taraf tārīkiyāñ aur aisī tanhā.ī ki bas

dil kī barbādī kā afsāna abhī chheḌā hī thā

anjuman meñ har taraf se ik sadā aa.ī ki bas

un kī āñkhoñ meñ jo ashk aa.e to yuuñ aa.e ki uf

un ke hoñToñ par hañsī aa.ī to yuuñ aa.ī ki bas

umr-bhar ke vāste chup ho gayā bīmār-e-ġham

aap ne kī bhī to kī aisī masīhā.ī ki bas

kyā kaheñ 'rāhī' ki apnoñ se hameñ kyā kyā milā

vo navāzish vo karam vo izzat-afzā.ī ki bas

sham-e-gham bimar ke dil par wo ban aai ki bas

har taraf tarikiyan aur aisi tanhai ki bas

dil ki barbaadi ka afsana abhi chheDa hi tha

anjuman mein har taraf se ek sada aai ki bas

un ki aankhon mein jo ashk aae to yun aae ki uf

un ke honTon par hansi aai to yun aai ki bas

umr-bhar ke waste chup ho gaya bimar-e-gham

aap ne ki bhi to ki aisi masihai ki bas

kya kahen 'rahi' ki apnon se hamein kya kya mila

wo nawazish wo karam wo izzat-afzai ki bas