sham-e-gham hai teri yaadon ko saja rakkha hai

shām-e-ġham hai tirī yādoñ ko sajā rakkhā hai

maiñ ne dānista charāġhoñ ko bujhā rakkhā hai

aur kyā duuñ maiñ gulistāñ se mohabbat kā subūt

maiñ ne kāñToñ ko bhī palkoñ pe sajā rakkhā hai

jaane kyuuñ barq ko is samt tavajjoh hī nahīñ

maiñ ne har tarah nasheman ko sajā rakkhā hai

zindagī sāñsoñ kā taptā huā sahrā hī sahī

maiñ ne is ret pe ik qasr banā rakkhā hai

vo mire sāmne dulhan kī tarah baiThe haiñ

ḳhvāb achchhā hai magar ḳhvāb meñ kyā rakkhā hai

ḳhud sunātā hai unheñ merī mohabbat ke ḳhutūt

phir bhī qāsid ne mirā naam chhupā rakkhā hai

kuchh na kuchh talḳhi-e-hālāt hai shāmil 'razmī'

tum ne phūloñ se bhī dāman jo bachā rakkhā hai

sham-e-gham hai teri yaadon ko saja rakkha hai

main ne danista charaghon ko bujha rakkha hai

aur kya dun main gulistan se mohabbat ka subut

main ne kanTon ko bhi palkon pe saja rakkha hai

jaane kyun barq ko is samt tawajjoh hi nahin

main ne har tarah nasheman ko saja rakkha hai

zindagi sanson ka tapta hua sahra hi sahi

main ne is ret pe ek qasr bana rakkha hai

wo mere samne dulhan ki tarah baiThe hain

KHwab achchha hai magar KHwab mein kya rakkha hai

KHud sunata hai unhen meri mohabbat ke KHutut

phir bhi qasid ne mera nam chhupa rakkha hai

kuchh na kuchh talKHi-e-haalat hai shamil 'razmi'

tum ne phulon se bhi daman jo bacha rakkha hai