sham hone wali thi jab wo mujhse bichhDa tha zindagi ki rahon mein

shaam hone vaalī thī jab vo mujh se bichhḌā thā zindagī kī rāhoñ meñ

sub.h jab maiñ jaagā thā vo jo mujh se bichhḌā thā so rahā thā bāhoñ meñ

mai-kade meñ sab ke sab jaam haath meñ le kar dostoñ meñ baiThe the

duur log masjid meñ rab ko yaad karte the dil kī bārgāhoñ meñ

vo zamīñ ke shahzāde tiir aur kamāñ le kar jañgaloñ meñ phirte the

ik hiran jo zaḳhmī thā dauḌtā huā aayā rādhikā kī bāhoñ meñ

ham pale charāġhoñ meñ raushnī se rishta thā nuur ham meñ rahtā thā

chāñd le ke vo nikle jin ko ham ne dekhā thā zulmatoñ kī bāhoñ meñ

auratoñ kī āñkhoñ par kaale kaale chashme the sab kī sab barahana thiiñ

zāhidoñ ne jab dekhā sāhiloñ kā ye manzar likh diyā gunāhoñ meñ

ham ne ahd-e-vustā ke saare tāj-dāroñ kī yādgāreñ dekhī haiñ

taaj sab meñ yaktā hai aur shāhjahāñ tanhā saare bādshāhoñ meñ

sham hone wali thi jab wo mujh se bichhDa tha zindagi ki rahon mein

subh jab main jaga tha wo jo mujh se bichhDa tha so raha tha bahon mein

mai-kade mein sab ke sab jam hath mein le kar doston mein baiThe the

dur log masjid mein rab ko yaad karte the dil ki bargahon mein

wo zamin ke shahzade tir aur kaman le kar jangalon mein phirte the

ek hiran jo zaKHmi tha dauDta hua aaya radhika ki bahon mein

hum pale charaghon mein raushni se rishta tha nur hum mein rahta tha

chand le ke wo nikle jin ko hum ne dekha tha zulmaton ki bahon mein

auraton ki aankhon par kale kale chashme the sab ki sab barahana thin

zahidon ne jab dekha sahilon ka ye manzar likh diya gunahon mein

hum ne ahd-e-wusta ke sare taj-daron ki yaadgaren dekhi hain

taj sab mein yakta hai aur shahjahan tanha sare baadshahon mein