sham hote hi ghar gae honge

shaam hote hī ghar ga.e hoñge

vo jo zinda the mar ga.e hoñge

koī āvāra ab kahāñ hogā

vo jo din the guzar ga.e hoñge

jo shanāvar the ab jazīroñ par

thak ke saare Thahar ga.e hoñge

koī qātil bhī ab nahīñ hogā

zaḳhm jitne the bhar ga.e hoñge

maiñ ye samjhā thā kuchh junūñ chehre

dasht meñ phir ubhar ga.e hoñge

kab Thaharte haiñ ḳhvāb āñkhoñ meñ

sub.h-dam kuuch kar ga.e hoñge

dukh zamāne ke phir kahāñ jaate

mere dil meñ utar ga.e hoñge

chhaT chukī hogī dhuul yādoñ kī

qāfile sab guzar ga.e hoñge

diip tū ne jalā.e kyoñ āḳhir

sab ujāloñ se Dar ga.e hoñge

naam us ne mirā liyā hogā

sab ke chehre utar ga.e hoñge

sham hote hi ghar gae honge

wo jo zinda the mar gae honge

koi aawara ab kahan hoga

wo jo din the guzar gae honge

jo shanawar the ab jaziron par

thak ke sare Thahar gae honge

koi qatil bhi ab nahin hoga

zaKHm jitne the bhar gae honge

main ye samjha tha kuchh junun chehre

dasht mein phir ubhar gae honge

kab Thaharte hain KHwab aankhon mein

subh-dam kuch kar gae honge

dukh zamane ke phir kahan jate

mere dil mein utar gae honge

chhaT chuki hogi dhul yaadon ki

qafile sab guzar gae honge

dip tu ne jalae kyon aaKHir

sab ujalon se Dar gae honge

nam us ne mera liya hoga

sab ke chehre utar gae honge