شام ہوتی رہی سائے ڈھلتے رہے

شام ہوتی رہی سائے ڈھلتے رہے

بیٹھے چوکھٹ پہ ہم ہاتھ ملتے رہے

ہجر کی ظلمتوں میں میں ڈوبا رہا

دیپ یادوں کے سب یوںہی جلتے رہے

جو بھی سوچا تھا کچھ وہ کہا نہ گیا

کتنے ارمان دل میں مچلتے رہے

اپنا رستا نہ تھا اپنی منزل نہ تھی

آپ کی کھوج میں پھر بھی چلتے رہے

میرے حالات تھوڑے سے کیا ڈھل گئے

رنگ سارے جہاں کے بدلتے رہے

زندگی ایک ایسا تماشا بنی

دل زمانے کے جس سے بہلتے رہے

تم سے دیپکؔ زباں بھی نہ بدلی گئی

لوگ چہرے ہزاروں بدلتے رہے