شام جزیرے خواب اجالے پیارے پیارے روشن روشن

شام جزیرے خواب اجالے پیارے پیارے روشن روشن

درد شجر سب بدن کنارے پیارے پیارے روشن روشن

تم سے بچھڑ کر جان جہاں ہم دیواروں میں قید ہوئے

چار قدم وہ ساتھ تمہارے پیارے پیارے روشن روشن

تیری خاطر لے آیا میں سب پیار گگن کی تصویریں

جھلمل کرتے چاند ستارے پیارے پیارے روشن روشن

کس کو خبر ہے کب کب ہم نے ان سے دل کی جوت جگائی

دور دہکتے دو انگارے پیارے پیارے روشن روشن

چاند کی باتیں پیار کے نغمے وہ سب آنگن شور ہوئے

دل کی بستی اور دکھیارے پیارے پیارے روشن روشن

کون مجھے یہ لے آیا ہے شہر کے اندھے گلیاروں میں

میری گلی کے سب اندھیارے پیارے پیارے روشن روشن

اس کی آنکھ کے کاجل کی ہم رات اندھیری کاٹ چکے

دور گگن پر شوخ اشارے پیارے پیارے روشن روشن

کیا وہ ہوا تھی بیچ بھنور میں دکھ کی نیا لے آئی

بہتی ندی میں شوق ستارے پیارے پیارے روشن روشن

خواب کے اس گھنگھور نگر میں کس سے ملنے جاتے ہو

دیکھو وہ ہیں قدم ہمارے پیارے پیارے روشن روشن

کس کی ظالم چاپ نے اجملؔ ہنس کا جوڑا اڑا دیا

لگتے تھے وہ ندی کنارے پیارے پیارے روشن روشن