sham kahti hai koi baat juda si likkhun

shaam kahtī hai koī baat judā sī likkhūñ

dil kā isrār hai phir us kī udāsī likkhūñ

aaj zaḳhmoñ ko mohabbat kī atā ke badle

tohfa o tamġha-e-ahbāb-shanāsī likkhūñ

saath ho tum bhī mire saath hai tanhā.ī bhī

kaun se dil se kise vaj.h-e-udāsī likkhūñ

jis ne dil māñgā nahīñ chhīn liyā hai mujh se

aap meñ aa.uuñ to vo aañkh hayā sī likkhūñ

mujh pe ho jaa.e tirī chashm-e-karam gar pal bhar

phir maiñ ye donoñ jahāñ ''bāt zarā sii'' likkhūñ

dauḌtī hai jo mire ḳhuun meñ terī hasrat

dekh ā.īna use ḳhuun kī pyāsī likkhūñ

tujh se kyuuñ duur hai majbūr hai 'shahzād' tirā

paḌh sake tū to maiñ sachchā.ī zarā sī likkhūñ

sham kahti hai koi baat juda si likkhun

dil ka israr hai phir us ki udasi likkhun

aaj zaKHmon ko mohabbat ki ata ke badle

tohfa o tamgha-e-ahbab-shanasi likkhun

sath ho tum bhi mere sath hai tanhai bhi

kaun se dil se kise wajh-e-udasi likkhun

jis ne dil manga nahin chhin liya hai mujh se

aap mein aaun to wo aankh haya si likkhun

mujh pe ho jae teri chashm-e-karam gar pal bhar

phir main ye donon jahan baat zara si likkhun

dauDti hai jo mere KHun mein teri hasrat

dekh aaina use KHun ki pyasi likkhun

tujh se kyun dur hai majbur hai 'shahzad' tera

paDh sake tu to main sachchai zara si likkhun