sham ke maddham ujalon mein wo Dar ka jagna

shaam ke maddham ujāloñ meñ vo Dar kā jāgnā

merī qismat meñ likhā hai umr-bhar kā jāgnā

ḳhāmushī se zulm kā kab ho sakā hai ehtijāj

dekhnā baaqī hai ab sū-e-nagar kā jāgnā

jab bhī vāpas lauTtā huuñ dekhtā huuñ maiñ faqat

ek tanhā shaam ke saa.e meñ ghar kā jāgnā

kaash dekhā hotā tum ne mere chehre par kabhī

raah taktī duur tak bebas nazar kā jāgnā

ziist kā hissa hai ab ḳhāmoshiyoñ ke darmiyāñ

saath mere ghar kī in dīvār-o-dar kā jāgnā

aañkh khulte hī vo aksar dekhte haiñ chupke se

dhaḌkanoñ ke shor meñ ik be-ḳhabar kā jāgnā

yaad hai vo sardiyoñ kī narm rāteñ aur phir

chaa.e kī vo chuskiyāñ le kar sahar kā jāgnā

sham ke maddham ujalon mein wo Dar ka jagna

meri qismat mein likha hai umr-bhar ka jagna

KHamushi se zulm ka kab ho saka hai ehtijaj

dekhna baqi hai ab su-e-nagar ka jagna

jab bhi wapas lauTta hun dekhta hun main faqat

ek tanha sham ke sae mein ghar ka jagna

kash dekha hota tum ne mere chehre par kabhi

rah takti dur tak bebas nazar ka jagna

zist ka hissa hai ab KHamoshiyon ke darmiyan

sath mere ghar ki in diwar-o-dar ka jagna

aankh khulte hi wo aksar dekhte hain chupke se

dhaDkanon ke shor mein ek be-KHabar ka jagna

yaad hai wo sardiyon ki narm raaten aur phir

chae ki wo chuskiyan le kar sahar ka jagna