شام خالی ہے اور سحر خالی

شام خالی ہے اور سحر خالی

شہر ہے یا کوئی کھنڈر خالی

سانپ قابض ہیں ہر خزانے پر

آدمی سب ہیں در بہ در خالی

آئیے خیر ہم تلاش کریں

پھیلتا جا رہا ہے شر خالی

رعب مفقود ہے صداؤں میں

شان دستار سے ہے سر خالی

اے اسیر قنوطیت شاعر

اپنا نقد و نظر سے بھر خالی

عبرت آموز ہے گراں خوابی

ابھی کترے گئے ہیں پر خالی

حشر اٹھے گا عنقریب یہاں

ہے بس اک آنچ کی کسر خالی

بس کوئی معتبر مسیحا ہو

دل میں بیٹھا ہوا ہے ڈر خالی

ہم اڑاتے ہیں فاختہ دن بھر

شعر کہتے ہیں رات بھر خالی

مینڈکی کو زکام ہو گیا ہے

گرچہ فتنہ ہے اس کی ٹر خالی

قبر میں کچھ سکون تھا پہلے

حال کہتا ہے یہ بھی کر خالی

ہم نہ بے ہوش ہوں تو کہیے گا

دیکھ لیں آپ اک نظر خالی

پھر لق و دق ہے سرفرازؔ کا دل

مثل صحرائے بے ضرر خالی