sham KHamosh hai peDon pe ujala kam hai

shaam ḳhāmosh hai peḌoñ pe ujālā kam hai

lauT aa.e haiñ sabhī ek parinda kam hai

dekh kar suukh gayā kaise badan kā paanī

maiñ na kahtā thā mirī pyaas se dariyā kam hai

ḳhud se milne kī kabhī gaañv meñ fursat na milī

shahr aa.e haiñ yahāñ milnā-milānā kam hai

aaj kyuuñ āñkhoñ meñ pahle se nahīñ haiñ aañsū

aaj kyā baat hai kyuuñ mauj meñ dariyā kam hai

apne mehmān ko palkoñ pe biThā letī hai

muflisī jāntī hai ghar maiñ bichhaunā kam hai

bas yahī soch ke karne lage hijrat aañsū

apnī lāshoñ ke muqābil yahāñ kāñdhā kam hai

dil kī har baat zabāñ par nahīñ aatī hai 'fahīm'

maiñ ne sochā hai ziyāda use likkhā kam hai

sham KHamosh hai peDon pe ujala kam hai

lauT aae hain sabhi ek parinda kam hai

dekh kar sukh gaya kaise badan ka pani

main na kahta tha meri pyas se dariya kam hai

KHud se milne ki kabhi ganw mein fursat na mili

shahr aae hain yahan milna-milana kam hai

aaj kyun aankhon mein pahle se nahin hain aansu

aaj kya baat hai kyun mauj mein dariya kam hai

apne mehman ko palkon pe biTha leti hai

muflisi jaanti hai ghar main bichhauna kam hai

bas yahi soch ke karne lage hijrat aansu

apni lashon ke muqabil yahan kandha kam hai

dil ki har baat zaban par nahin aati hai 'fahim'

main ne socha hai ziyaada use likkha kam hai