شام کو پار کیا شب سے نکل کر آئے

شام کو پار کیا شب سے نکل کر آئے

تب کہیں جا کے ترے قد کے برابر آئے

سنگ دشنام تو برسا کئے مجھ پر لیکن

میری تصویر جو ٹوٹے تو وہ لشکر آئے

اک عجب شور ہوا درد اٹھا دل سہما

دشمن جان مری جاں سے نکل کر آئے

چاندنی رات میں سائے تو بہت نکلے تھے

چاندنی رات ذرا اور چمک کر آئے

کتنے اوصاف مری جان سے بہتر ٹھہرے

کتنے ارمان ترے غم کے برابر آئے

چاند کتنے تری یادوں کے سفر میں نکلے

پھول ملنے تجھے صحرا سے نکل کر آئے

خواب کتنے تری چاہت کے تہہ آب ہوئے

چاہ میں تیری ہی آنکھوں میں سمندر آئے

کوئی آہٹ ترے قدموں کے فسوں کو توڑے

رنگ کوئی تری رنگت کے برابر آئے

آنکھ جھپکو تو یہاں ہوتی ہیں آنکھیں خالی

دل کے صحرا میں کوئی سوچ سمجھ کر آئے

مجھ کو دیتا رہا ہر شخص یہاں درس جنوں

لیکن الزام فقط میرے سخن پر آئے

کوئی اجملؔ سا یہاں آیا ہے اے شام فراق

کتنے شاعر یہاں آئے ہیں سخنور آئے