sham ko par kiya shab se nikal kar aae

shaam ko paar kiyā shab se nikal kar aa.e

tab kahīñ jā ke tire qad ke barābar aa.e

sang-e-dushnām to barsā kiye mujh par lekin

merī tasvīr jo TuuTe to vo lashkar aa.e

ik ajab shor huā dard uThā dil sahmā

dushman-e-jān mirī jaañ se nikal kar aa.e

chāñdnī raat meñ saa.e to bahut nikle the

chāñdnī raat zarā aur chamak kar aa.e

kitne ausāf mirī jaan se behtar Thahre

kitne armān tire ġham ke barābar aa.e

chāñd kitne tirī yādoñ ke safar meñ nikle

phuul milne tujhe sahrā se nikal kar aa.e

ḳhvāb kitne tirī chāhat ke tah-e-āb hue

chaah meñ terī hī āñkhoñ meñ samundar aa.e

koī aahaT tire qadmoñ ke fusūñ ko toḌe

rang koī tirī rangat ke barābar aa.e

aañkh jhapko to yahāñ hotī haiñ āñkheñ ḳhālī

dil ke sahrā meñ koī soch-samajh kar aa.e

mujh ko detā rahā har shaḳhs yahāñ dars-e-junūñ

lekin ilzām faqat mere suḳhan par aa.e

koī 'ajmal' sā yahāñ aaya hai ai shām-e-firāq

kitne shā.ir yahāñ aa.e haiñ suḳhanvar aa.e

sham ko par kiya shab se nikal kar aae

tab kahin ja ke tere qad ke barabar aae

sang-e-dushnam to barsa kiye mujh par lekin

meri taswir jo TuTe to wo lashkar aae

ek ajab shor hua dard uTha dil sahma

dushman-e-jaan meri jaan se nikal kar aae

chandni raat mein sae to bahut nikle the

chandni raat zara aur chamak kar aae

kitne ausaf meri jaan se behtar Thahre

kitne arman tere gham ke barabar aae

chand kitne teri yaadon ke safar mein nikle

phul milne tujhe sahra se nikal kar aae

KHwab kitne teri chahat ke tah-e-ab hue

chah mein teri hi aankhon mein samundar aae

koi aahaT tere qadmon ke fusun ko toDe

rang koi teri rangat ke barabar aae

aankh jhapko to yahan hoti hain aankhen KHali

dil ke sahra mein koi soch-samajh kar aae

mujh ko deta raha har shaKHs yahan dars-e-junun

lekin ilzam faqat mere suKHan par aae

koi 'ajmal' sa yahan aaya hai ai sham-e-firaq

kitne shair yahan aae hain suKHanwar aae