sham ko subh ki aur subh ko hai sham ki baat

shaam ko sub.h kī aur sub.h ko hai shaam kī baat

kaise nādāñ haiñ vo karte hī nahīñ kaam kī baat

jab kiyā karte haiñ ham sāqī-e-gulfām kī baat

lab pe aa jaatī hai aksar dil-e-nākām kī baat

Dhalte sūraj ko dikhāyā to kabhī gul kī hayāt

ham se is tarah se kī husn ke anjām kī baat

nafrat-o-buġhz-o-ta.assub ke alāva tum se

aaj tak ho na sakī koī kabhī kaam kī baat

jalte shahroñ kā dhuāñ āñkhoñ meñ ghūmā aksar

yaad aa.ī hai jo guzre hue ayyām kī baat

jo bahāroñ kī latāfat ko samajhte hī na hoñ

un se sayyād kare kyoñ qafas-o-dām kī baat

hai zarūrat ki mohabbat kā sabaq deñ sab ko

aao ham mil ke kareñ azmat-e-islām kī baat

kaun sā jurm hai farmā.eñ zamāne vaale

tishna-lab karte haiñ saaqī se agar jaam kī baat

ranj rāhat se badalte to maza aa jaatā

mahfil-e-aish meñ hotī ġham-o-ālām kī baat

ḳhuub dozaḳh se Darātā hai gunahgāroñ ko

lab pe vaa.iz ke nahīñ hai karam-e-ām kī baat

be-dhaḌak 'josh' vo baḌhte rahe manzil kī taraf

qāfile vāloñ ne sochī nahīñ anjām kī baat

sham ko subh ki aur subh ko hai sham ki baat

kaise nadan hain wo karte hi nahin kaam ki baat

jab kiya karte hain hum saqi-e-gulfam ki baat

lab pe aa jati hai aksar dil-e-nakaam ki baat

Dhalte suraj ko dikhaya to kabhi gul ki hayat

hum se is tarah se ki husn ke anjam ki baat

nafrat-o-bughz-o-tassub ke alawa tum se

aaj tak ho na saki koi kabhi kaam ki baat

jalte shahron ka dhuan aankhon mein ghuma aksar

yaad aai hai jo guzre hue ayyam ki baat

jo bahaaron ki latafat ko samajhte hi na hon

un se sayyaad kare kyon qafas-o-dam ki baat

hai zarurat ki mohabbat ka sabaq den sab ko

aao hum mil ke karen azmat-e-islam ki baat

kaun sa jurm hai farmaen zamane wale

tishna-lab karte hain saqi se agar jam ki baat

ranj rahat se badalte to maza aa jata

mahfil-e-aish mein hoti gham-o-alam ki baat

KHub dozaKH se Daraata hai gunahgaron ko

lab pe waiz ke nahin hai karam-e-am ki baat

be-dhaDak 'josh' wo baDhte rahe manzil ki taraf

qafile walon ne sochi nahin anjam ki baat