شامل مرے وجود میں ہے بود و باش میں

شامل مرے وجود میں ہے بود و باش میں

میں دور تک نہ جاؤں گا اس کی تلاش میں

مغرور کوئی ہوگا صنم حسن پر مگر

خوبی تو ہے نگاہ میں کچھ بت تراش میں

کاٹا تو اپنے دانت سے اک آدمی نے تھا

سانپوں کا زہر کیسے ملا میری لاش میں

حسن و شباب شان خدا داد بانکپن

اک ایک کر کے لٹ گئے فکر معاش میں

تاریخ میں ابھی بھی تمہی جاں نثار ہو

تبدیل کیسے ہو گئے تم زندہ لاش میں

فطرت میں ہو فریب تو چہرے سے ہر کوئی

بہروپیا سا لگتا ہے اپنے قماش میں

وہ چال کیا چلے گا نئی جانتے ہیں سب

باون ہی پتے آج بھی ہوتے ہیں تاش میں

گوہرؔ تمھارے لفظ اٹکنے لگے ہیں کیوں

کچھ بات ہے ضرور گلے کی خراش میں