shamil mere wujud mein hai bud-o-bash mein

shāmil mire vujūd meñ hai būd-o-bāsh meñ

maiñ duur tak na jā.uñgā us kī talāsh meñ

maġhrūr koī hogā sanam husn par magar

ḳhūbī to hai nigāh meñ kuchh but-tarāsh meñ

kaaTā to apne daañt se ik aadmī ne thā

sāñpoñ kā zahr kaise milā merī laash meñ

husn-o-shabāb shān-e-ḳhudā-dād bāñkpan

ik ek kar ke luT ga.e fikr-e-ma'āsh meñ

tārīḳh meñ abhī bhī tumhī jāñ-nisār ho

tabdīl kaise ho ga.e tum zinda laash meñ

fitrat meñ ho fareb to chehre se har koī

bahrūpiyā sā lagtā hai apne qimāsh meñ

vo chaal kyā chalegā na.ī jānte haiñ sab

bāvan hī patte aaj bhī hote haiñ taash meñ

'gauhar' tumhāre lafz aTakne lage haiñ kyoñ

kuchh baat hai zarūr gale kī ḳharāsh meñ

shamil mere wujud mein hai bud-o-bash mein

main dur tak na jaunga us ki talash mein

maghrur koi hoga sanam husn par magar

KHubi to hai nigah mein kuchh but-tarash mein

kaTa to apne dant se ek aadmi ne tha

sanpon ka zahr kaise mila meri lash mein

husn-o-shabab shan-e-KHuda-dad bankpan

ek ek kar ke luT gae fikr-e-ma'ash mein

tariKH mein abhi bhi tumhi jaan-nisar ho

tabdil kaise ho gae tum zinda lash mein

fitrat mein ho fareb to chehre se har koi

bahrupiya sa lagta hai apne qimash mein

wo chaal kya chalega nai jaante hain sab

bawan hi patte aaj bhi hote hain tash mein

'gauhar' tumhaare lafz aTakne lage hain kyon

kuchh baat hai zarur gale ki KHarash mein