شاید کسی نے آپ سے یہ کہہ دیا غلط

شاید کسی نے آپ سے یہ کہہ دیا غلط

ممکن ہے آپ ہی نے کہیں سن لیا غلط

واللہ اب بھی آپ کا میں جاں نثار ہوں

میں اور آپ ہی سے کہوں گا بھلا غلط

مدت کے بعد آج نظر آئے شکر ہے

دیکھا یہ جب سے تم کو مرا غم ہوا غلط

ہم کو نہیں ہے واسطہ کچھ عشق سے ولے

چرچا کسی نے کر دیا ہے جا بجا غلط

جاتے تھے گھر رقیب کے پر آ گئے یہاں

ان کو بتا دیا ہے کسی نے پتا غلط

ہم نے سنا کہ حضرت کاملؔ گزر گئے

ہے آرزو کہ نکلے خبر یا خدا غلط