shayad meri nigah mein koi shigaf tha

shāyad mirī nigāh meñ koī shigāf thā

varna udaas raat kā chehrā to saaf thā

ik laash tairtī rahī barfīlī jhiil meñ

jhūTī tasalliyoñ kā amiiñ zer-e-nāf thā

bosoñ kī raakh meñ the sulagte sharār-e-lams

chehre kī silvaToñ meñ koī inkishāf thā

dozaḳh ke gird gūñge farishte the mahv-e-raqs

aur pisliyoñ kī Tiis pe mailā ġhilāf thā

khiḌkī se jhāñktā huā vo pur-ġhurūr sar

taaza havā se us kā koī iḳhtilāf thā

raste farār ke sabhī masdūd to na the

apnī shikast kā mujhe kyuuñ e'tirāf thā

shayad meri nigah mein koi shigaf tha

warna udas raat ka chehra to saf tha

ek lash tairti rahi barfili jhil mein

jhuTi tasalliyon ka amin zer-e-naf tha

boson ki rakh mein the sulagte sharar-e-lams

chehre ki silwaTon mein koi inkishaf tha

dozaKH ke gird gunge farishte the mahw-e-raqs

aur pisliyon ki Tis pe maila ghilaf tha

khiDki se jhankta hua wo pur-ghurur sar

taza hawa se us ka koi iKHtilaf tha

raste farar ke sabhi masdud to na the

apni shikast ka mujhe kyun e'tiraf tha