shayad wo paDh sakenge na likkha hua tamam

shāyad vo paḌh sakeñge na likkhā huā tamām

ḳhat merā āñsuon meñ hai bhīgā huā tamām

rūdād-e-dard-e-ishq sunāne chalā thā maiñ

tum se milī nigāh to qissa huā tamām

dil merā hasratoñ kī hai duniyā liye hue

āñkhoñ meñ sail-e-ashk hai Thahrā huā tamām

ūñchī 'imārateñ haiñ magar pasta-qad haiñ log

ye terā shahr merā hai dekhā huā tamām

tevar kuchh ab ke aur haiñ fasl-e-bahār ke

ġhuncha koī khilā bhī to bikhrā huā tamām

ab ye chaman bhī dosto kuchh ġhair sā lage

har chand apne ḳhuuñ se hai sīñchā huā tamām

in mah-ruḳhoñ ke 'ishq meñ 'afsar' mirā kalām

aatā hai bām-e-arsh se nikhrā huā tamām

shayad wo paDh sakenge na likkha hua tamam

KHat mera aansuon mein hai bhiga hua tamam

rudad-e-dard-e-ishq sunane chala tha main

tum se mili nigah to qissa hua tamam

dil mera hasraton ki hai duniya liye hue

aankhon mein sail-e-ashk hai Thahra hua tamam

unchi 'imaraten hain magar pasta-qad hain log

ye tera shahr mera hai dekha hua tamam

tewar kuchh ab ke aur hain fasl-e-bahaar ke

ghuncha koi khila bhi to bikhra hua tamam

ab ye chaman bhi dosto kuchh ghair sa lage

har chand apne KHun se hai sincha hua tamam

in mah-ruKHon ke 'ishq mein 'afsar' mera kalam

aata hai baam-e-arsh se nikhra hua tamam