shab Dhale gumbad-e-asrar mein aa jata hai

shab Dhale gumbad-e-asrār meñ aa jaatā hai

ek saaya dar-o-dīvār meñ aa jaatā hai

maiñ abhī ek havāle se use dekhtā huuñ

daf.atan vo na.e kirdār meñ aa jaatā hai

yuuñ shab-e-hijr shab-e-vasl meñ Dhal jaatī hai

koī mujh sā mirī guftār meñ aa jaatā hai

mujh sā dīvāna koī hai jo tire naam ke saath

raqs kartā huā bāzār meñ aa jaatā hai

jab vo kartā hai na.e Dhab se mirī baat ko radd

lutf kuchh aur bhī guftār meñ aa jaatā hai

dekhnā us ko bhī paḌtā hai miyāñ duniyā meñ

sāmne jo yūñhī be-kār meñ aa jaatā hai

ek din qais se jā miltā hai vahshat ke tufail

jo bhī is dasht-e-suḳhan-zār meñ aa jaatā hai

maiñ kabhī ḳhud ko agar DhūñDhnā chāhūñ 'ahmad'

dūsrā ma.ariz-e-iz.hār meñ aa jaatā hai

shab Dhale gumbad-e-asrar mein aa jata hai

ek saya dar-o-diwar mein aa jata hai

main abhi ek hawale se use dekhta hun

dafatan wo nae kirdar mein aa jata hai

yun shab-e-hijr shab-e-wasl mein Dhal jati hai

koi mujh sa meri guftar mein aa jata hai

mujh sa diwana koi hai jo tere nam ke sath

raqs karta hua bazar mein aa jata hai

jab wo karta hai nae Dhab se meri baat ko radd

lutf kuchh aur bhi guftar mein aa jata hai

dekhna us ko bhi paDta hai miyan duniya mein

samne jo yunhi be-kar mein aa jata hai

ek din qais se ja milta hai wahshat ke tufail

jo bhi is dasht-e-suKHan-zar mein aa jata hai

main kabhi KHud ko agar DhunDhna chahun 'ahmad'

dusra mariz-e-izhaar mein aa jata hai