shab-e-firaq jo dil mein KHayal-e-yar raha

shab-e-firāq jo dil meñ ḳhayāl-e-yār rahā

pas-e-fanā bhī tasavvur meñ intizār rahā

uḌā rahe haiñ mirī ḳhaak ko vo Thokar se

ilāhī mujh se to achchhā mirā ġhubār rahā

nazar milāte hī hāthoñ se dil chalā merā

kisī ko dekh ke dil par na iḳhtiyār rahā

kisī kī nargis-e-mastāna phir ga.ī jab se

na vo surūr na āñkhoñ meñ vo ḳhumār rahā

shab-e-firāq kī tanhā.ī meñ thā kaun aniis

ḳhayāl-e-yār hī ik apnā ġham-gusār rahā

vafā nahīñ to nahīñ mūrid-e-jafā hī sahī

hazār shukr ki maiñ dāḳhil-e-shumār rahā

ye Dore Daale haiñ kis chashm-e-mast ne ai 'nāz'

ki hashr tak mirī āñkhoñ meñ ik ḳhumār rahā

shab-e-firaq jo dil mein KHayal-e-yar raha

pas-e-fana bhi tasawwur mein intizar raha

uDa rahe hain meri KHak ko wo Thokar se

ilahi mujh se to achchha mera ghubar raha

nazar milate hi hathon se dil chala mera

kisi ko dekh ke dil par na iKHtiyar raha

kisi ki nargis-e-mastana phir gai jab se

na wo surur na aankhon mein wo KHumar raha

shab-e-firaq ki tanhai mein tha kaun anis

KHayal-e-yar hi ek apna gham-gusar raha

wafa nahin to nahin murid-e-jafa hi sahi

hazar shukr ki main daKHil-e-shumar raha

ye Dore Dale hain kis chashm-e-mast ne ai 'naz'

ki hashr tak meri aankhon mein ek KHumar raha