شب فراق کے بارے میں اور کیا کہیے

شب فراق کے بارے میں اور کیا کہیے

کسی فقیر کی مقبول بد دعا کہیے

ہر ایک شخص ہے اپنی ہی ذات میں گم صم

کوئی بتائے کسے کس کا مبتلا کہیے

اس اعتقاد کے صدقے نہ کیوں بھلا جائیں

جو شخص بت بھی نہیں ہے اسے خدا کہیے

اجل کی سمت سبھی لوگ ہیں رواں یعنی

اسے بھی زندگی کا کوئی راستہ کہیے

کسی کا عکس حقیقی نہیں دکھاتا ہے

اس آئنے کو بھلا کیسے آئنہ کہیے

میں اپنے طور سے کرتا ہوں بات دل کی خضرؔ

ادائے غیر سے کیا دل کا مدعا کہیے