shab-e-firaq ke bare mein aur kya kahiye

shab-e-firāq ke baare meñ aur kyā kahiye

kisī faqīr kī maqbūl badduā kahiye

har ek shaḳhs hai apnī hī zaat meñ gum-sum

koī batā.e kise kis kā mubtalā kahiye

is e'tiqād ke sadqe na kyoñ bhalā jaa.eñ

jo shaḳhs but bhī nahīñ hai use ḳhudā kahiye

ajal kī samt sabhī log haiñ ravāñ ya.anī

use bhī zindagī kā koī rāsta kahiye

kisī kā aks-e-haqīqī nahīñ dikhātā hai

is aa.ine ko bhalā kaise aa.ina kahiye

maiñ apne taur se kartā huuñ baat dil kī 'ḳhizar'

adā-e-ġhair se kyā dil kā mudda.ā kahiye

shab-e-firaq ke bare mein aur kya kahiye

kisi faqir ki maqbul baddua kahiye

har ek shaKHs hai apni hi zat mein gum-sum

koi batae kise kis ka mubtala kahiye

is e'tiqad ke sadqe na kyon bhala jaen

jo shaKHs but bhi nahin hai use KHuda kahiye

ajal ki samt sabhi log hain rawan yani

use bhi zindagi ka koi rasta kahiye

kisi ka aks-e-haqiqi nahin dikhata hai

is aaine ko bhala kaise aaina kahiye

main apne taur se karta hun baat dil ki 'KHizar'

ada-e-ghair se kya dil ka muddaa kahiye