shab-e-furqat mein aankhon se meri ashk-e-alam nikle

shab-e-furqat meñ āñkhoñ se mirī ashk-e-alam nikle

añdherā bhī ziyāda thā sitāre bhī na kam nikle

hamāre ghar meñ Daaka Daal kar Daaku pashemāñ haiñ

shikasta sāz-o-sāmāñ aur kuchh phūTe diram nikle

maiñ aisā saḳht-jāñ huuñ aazmā kar dekh le qātil

nahīñ mumkin ki terī burrish-e-ḳhanjar se dam nikle

nahīñ jāh-o-nasab se nāmvar 'iqbāl' yā 'ġhālib'

‘alam-bardār-e-shohrat un ke rash.hāt-e-qalam nikle

kisī par hai karam apnā kisī se raah rakhte ho

batāo ek ham kyoñ taḳhta-e-mashq-e-sitam nikle

huā haq jalva-gar jis dam rafū-chakkar huā bātil

ḳhudā kā ghar banā kā'ba to kā'be se sanam nikle

mirī taqdīr bhī yārab hai koī kākul-e-jānāñ

agarche laakh suljhāyā na is ke pech-o-ḳham nikle

mujhe rakkhā añdhere meñ sar-o-sāmān-e-'ishrat ne

charāġh-e-rāh gar nikle to mere dāġh-e-ġham nikle

kisī se ham-suḳhan hote lagā kartā hai Dar mujh ko

kahīñ aisā na ho ik baat meñ pahlū-e-dam nikle

jahāñ kāñTe vahāñ gul haiñ ye duniyā maz.har-e-azdād

'adāvat karne vāloñ meñ mohabbat-kesh ham nikle

liyā un kā sahārā Dūbne vāloñ ne ai 'bartar'

jinheñ nākāra ham samjhe vahī tinke aham nikle

shab-e-furqat mein aankhon se meri ashk-e-alam nikle

andhera bhi ziyaada tha sitare bhi na kam nikle

hamare ghar mein Daka Dal kar Daku pasheman hain

shikasta saz-o-saman aur kuchh phuTe diram nikle

main aisa saKHt-jaan hun aazma kar dekh le qatil

nahin mumkin ki teri burrish-e-KHanjar se dam nikle

nahin jah-o-nasab se namwar 'iqbaal' ya 'ghaalib'

‘alam-bardar-e-shohrat un ke rashhat-e-qalam nikle

kisi par hai karam apna kisi se rah rakhte ho

batao ek hum kyon taKHta-e-mashq-e-sitam nikle

hua haq jalwa-gar jis dam rafu-chakkar hua baatil

KHuda ka ghar bana ka'ba to ka'be se sanam nikle

meri taqdir bhi yarab hai koi kakul-e-jaanan

agarche lakh suljhaya na is ke pech-o-KHam nikle

mujhe rakkha andhere mein sar-o-saman-e-'ishrat ne

charagh-e-rah gar nikle to mere dagh-e-gham nikle

kisi se ham-suKHan hote laga karta hai Dar mujh ko

kahin aisa na ho ek baat mein pahlu-e-dam nikle

jahan kanTe wahan gul hain ye duniya mazhar-e-azdad

'adawat karne walon mein mohabbat-kesh hum nikle

liya un ka sahaara Dubne walon ne ai 'bartar'

jinhen nakara hum samjhe wahi tinke aham nikle