shab-e-gham aish ka muzhda sunane kaun aata hai

shab-e-ġham aish kā muzhda sunāne kaun aatā hai

ye mere āñsuoñ meñ muskurāne kaun aatā hai

Thahar saktā nahīñ siine meñ jab dil muztarib ho kar

sukūñ ban kar mire pahlū meñ jaane kaun aatā hai

kuchal detī hai jab ehsās ko sanjīdgī ġham kī

sharārat se mirā dil gudgudāne kaun aatā hai

bhayānak tīrgī meñ ġham kī jab dam ghuTne lagtā hai

charāġh-e-kushta-e-ishrat jalāne kaun aatā hai

shab-e-ġham dil pe chhā jaatā hai jab ik huzn-e-be-ḳhvābī

nashāt-e-rūh ban ban kar sulāne kaun aatā hai

vafūr-e-yās kar detā hai jab labrez-e-ġham dil ko

ḳhushī ban kar mire dil meñ samāne kaun aatā hai

ajal ke tez qadmoñ kī jab aahaT aane lagtī hai

ba-andāz-e-masīhā.ī sirhāne kaun aatā hai

mirā dil Dūbne lagtā hai jab ġham ke samundar meñ

mirī kashtī ko sāhil se lagāne kaun aatā hai

nazar aatā hai jis meñ ishrat-e-māzī kā mustaqbil

mujhe is ḳhvāb-e-ġhamgīñ se jagāne kaun aatā hai

shab-e-gham aish ka muzhda sunane kaun aata hai

ye mere aansuon mein muskurane kaun aata hai

Thahar sakta nahin sine mein jab dil muztarib ho kar

sukun ban kar mere pahlu mein jaane kaun aata hai

kuchal deti hai jab ehsas ko sanjidgi gham ki

shararat se mera dil gudgudane kaun aata hai

bhayanak tirgi mein gham ki jab dam ghuTne lagta hai

charagh-e-kushta-e-ishrat jalane kaun aata hai

shab-e-gham dil pe chha jata hai jab ek huzn-e-be-KHwabi

nashat-e-ruh ban ban kar sulane kaun aata hai

wafur-e-yas kar deta hai jab labrez-e-gham dil ko

KHushi ban kar mere dil mein samane kaun aata hai

ajal ke tez qadmon ki jab aahaT aane lagti hai

ba-andaz-e-masihai sirhane kaun aata hai

mera dil Dubne lagta hai jab gham ke samundar mein

meri kashti ko sahil se lagane kaun aata hai

nazar aata hai jis mein ishrat-e-mazi ka mustaqbil

mujhe is KHwab-e-ghamgin se jagane kaun aata hai